السبت، 15 مارس 2008

احنا شعب يموت فى المصايب

النهارده وانا راجع م الدرس لا مش النهارده الساعه كام دلوقتى
اتنين الا تلت
يعنى امبارح استنوا ابص فى الجرنال اشوف التاريخ كام
اه
15مارس
كنت راجع من الدرس فى تمام الساعه الثامنه وتلت
كانت حصه كبيره اوى
امتحنا فيها واخدنا الدرس الجديد وتاريخ بقى وملل
وسعد زغلول جه وسعد مجاش
وجبت 48من50 شطور انا من صغرى
المهم مش عايزيين ننحرف عن المووضوع الاصلى تانى عشان انا اصلا مش بحب الرغى

المهم ماشى فى الشارع لقيت لمه مش كبيره يعنى حوالى عشرين تلاتين واحد قدام ميكروباص بيروحوا شنباب
واحد ماسك ست وهيا ماسكه فيه اكيد يعنى لزام اقف اشوف ايه اللى هيحصل
شويه شويه الناس كترت
وهووب لقينا واحد راح ضارب الراجل بالعصايه
سالت واحد جنبى هوا فيه ايه
قالى مش عارف والله
سالت احد تانى هوا فيه ايه نفس الرد
تالت رابع خامس نفس الرد
يعنى افهم من كدا ان الناس دى كلها واقفه ومش فاهمه فيه بتتفرج وخلاص
طيب على الاقل نعرف الحكايه
عشان نستمتع واحنا بنتفرج
ولا احنا بنتفرج وخلاص
شويه ولقينا الناس بتجرى ورا واحد كدا
وهوب الناس اللى واقفه كلها راحت وراهم
مش بتجرى عشان تمسكه عشان مش يفوتهم حاجه
هههههههههههههههههههه
يجوا من هنا ويرحوا هنا والناس وراهم ومحدش عارف اى حاجه

لحد ما البوكس جه واكيد يعنى البوليس فى الافلام وف الواقع بيجى بعد ما كل حاجه تخلص
واخدهم ومشى
واتباع قالك شنباب شمباب شنباب شمباب

المهم يعنى عشان مش نطول عليكم
اننا شعب بنموت فى الخنقات والمصايب
واى حاجه وحشه
نتلم حواليها
شوف اى حادثه بتحصل كدا
هتلاقى ميات واقفه عشان تعرف الحادثه حصلت ازاى واول ما يعرف حصلت ازاى يقولك
تؤتؤتؤتؤ يا حرام طيب هوا ايه بس اللى خلاه يكسر يمين

ولا شوف اتنين بيتكلموا على خناقه بعد ما خلصت
بس الواد اللى كان بيضرب دا صعب عليا والله شكله كدا غلبان وطيب وابن حلال بس غلطت برده لما شتمه
بس اسكت اداله بوكس ياض جابه ارضى

مش عارف ليه
طيب ليه لو خناقه حد يدخل يسلك وتخلص والكل يروحا
تلاقى الكل واقف ومحدش بيسلك غير اتنين تلاته وبيشيلو ضرل للصبح
والباقى واقف بيتابع بس
يلا نعمل ايه بقى اتعودنا على كدا





الجمعة، 14 مارس 2008

اهلاوووووووووووووووى على طووووووووول

الاهلى فى كل حته عمال يجيب اجوان

اهلى اهلى هو هو

مبرووووووووووووووووك لاهلى على الفوز
2/0
انتوا عارفين احسن حاجه ايه
انهم كانو عارفين انهم هيتهزموا وبرده بيلعبوا
ههههههههه

والجونيين غلط من الدفاع
هههههههههههههه

وبيب اهلى بيب اهلى
يلا نلقاهم فى لقاء القمه 102

الخميس، 13 مارس 2008

نسوان مشهورات(4)


أم كلثوم هي أم كلثوم فاطمة بنت إبراهيم بن أبي البلتاجي بن عبد مناف , أسلمت وبايعت في قرية طماى الزهايرة مركز السنبلاوين محافظة الدقهلية في وادي النيل كان والدها عبدا صالحا وكان يعمل مؤذناً لمسجد القرية ويؤدى التواشيح ويقوم بأحلى الليالى الدينية . هاجرت سنة سبع للهجرة وكان خروجها زمن صلح الحديبية ، و في الطريق قام بحراستها أحد المؤمنين من قبيلة خزاعة، وصحيح أن الخروج مع شخص غريب حرام ولكن في حالة أم كلثوم كان يجب عليها أن تهاجر بأي طريقة , لكي لا تفتن في دينها ، وفي ذلك الوقت لم تنزل بعد آيات التحريم والحجاب . وعندما بلغت القاهرة المنورة ظنت أنها بوصولها هدفها قد بلغت بر الأمان ، ولم تكن تعلم أن أخويها : الوليد وعمار قد انطلقا من قرية طماى الزهايرة خلفها .
كانت ذات طباع و ميول دكتاتورية و نرجسية وغطت على مواهب أسمهانية . كثر الشائعات عن حياتها فيقول البعض ان ام كلثوم تزوجت التابعى الجليل مصطفي أمين وإنها أبقت زواجها من أمين سرا وحدثنا أبوالمبارك حسنى إن الموسيقار محمود الشريف كان يشاهد خارجا من غرفة نومها بالروب ولكنه نفى أن يكون القصبجي عاشقا لأم كلثوم . يقول البعض ان هناك 14 شائعة زواج و أولها وإستنادا الى كتاب ابن بطوطة مذكرات الحمار الفرحان اثناء التجول في البلدان عن زواجها وانجابها ثلاثة أطفال في قريتها طماي الزهايرة قبل انتقالها إلي القاهرة وقيل إنها تزوجت أحد أفراد فرقتها الموسيقية زواجا صوريا حتي تستطيع السفر إلي فلسطين لإحياء حفلة ، وكان شرط السفر أن يكون معها محرم وهي لم تنف ذلك لأنه كان مجرد عقد وقيل إنها تزوجت شريف صبري باشا خال الملك فاروق سراً وعرفاً . توفيت رضي الله عنها في شهر شعبان سنة 1975 بعد الهجرة .
امرأة في السبعين من عمرها تقول:خدني لحنانك خدني ياشيخه خدك ربنا

الأربعاء، 12 مارس 2008

مبروك يا اروتى



مبروك لاروى عشان نجحت




بس مش عارف جابت كام لسه اصلى مخاصمها




يلا ربنا يوفقك يا اروى فى حياتك كلها وفى بقيت دراستك


واشوف اسمك فى لوحه الشرف يارب


ما تقولوا امين






دى هديتى ليكى بقى










الأحد، 9 مارس 2008

ارسلها والا سوف تموت موته نصوحا


الله لا أله الا أنت سبحانك أنى كنت من الظالمين

أنشر الدعاء ده ل799 واحد -قول 800- و هتسمع خبر حلو بعد عشر دقايق

ملحوظه : واحد مبعتش الدعاء الا لـ500 واحد بس وقعت على راسه طياره هرست أمه

و واحد بعتها لـ800 واحد, جورج كرداحى بذات نفسه أتصل بيه و قاله : مبروك عم كسبت المليون ريال

و واحد بعتها لألف واحد, بقى المذيع فى البرنامج بدل جورج كرداحى

أبعتها و ألا هتدخل نار جهنم و بأس المصير


ايه رأيكم فى شكليه الرسايل ألى بتيجى زى دى ؟ والنبى متتخير عنهم .. انا المفروض يخلونى أكتب حاجات من دى والله أنا مش هبدأ كلامى ولا هقول أنا عايز ايه , الا لما تقرأوا رساله حقيقيه وصلتلى


شخص اسمة محمد الفيشاوي اقسم بالله انة راي الرسول في المنام وقال لة بلغ الاسلام والمسلمين عني السلام

فمن ينشرها خلال اربعة ايام فسوف يفرح فرحا شديدا

ومن يتجاهلها فسوف يحزن حزنا شديدا

(لااله الا الله سبحانك انت ربي فاغفرلي اني كنت من الظالمين)

ارسلها الي 25شخص وستسمع خبر مفرح الليلهيا صلاه الزين يا صلاه الزين ..

من هذا المدعو محمد الفيشاوى بحق الجحيم .. و من هو حتى يظهر له النبى - صلى الله عليه و سلم - فى المنام

أهو صلاح الدين القليوبى - ده صلاح الدين بتاع القليوبيه .. مش بتاع القدس - ولا هو مين بالظبط

أم هو من سيقود جيوش المسلمين فى الجهاد بما أن شمعته قايده و بيشوف النبى فى المنام .. يا عم بلا جهاد بلا عز الدين أيمن

و تعالوا معانا نحللها كده .. يعنى هو الرسول - ص - قاله يبعت الكلام ده ل 25 واحد على الايميل .. و قاله - عليه الصلاه و السلام - ان ألى مش هيبعتها خلال اربع ايام هيسمع خبر محزن , و ألى هيبعتها قبل أنتهاء المهله هيفرح فرحاً شديداً

و بعدين رجع يقول تانى ألى هيبعتها هيسمع خبراً مفرحاً الليله .. يعنى مش خلال اربعه أيام

ما علينا يمكن الرؤيه مكانتش واضحه

و لا يمكن قصده أن الرسول مقالش كده فى الرؤيه .. و أن موضوع الأربعه أيام و ال 25 شخص دول من عنده هو .. و ده معناه طبعاً حاجه من حاجتين

رقم 1 : أن الباشا مكشوف عنه الحجاب

رقم 2 : أنه حط تعويذه سحريه فى فايرس على الأنترنت عشان تأذى اى حد ميبعتش الرساله

و طبعاً موضوع الرؤيه أفضل من الأقتراحين ألى فاتواو طبعاً هو عادى لأن فى ناس بتشوف رؤيات و بتشوف الرسول فعلاً .. بس لكل الأسباب السابقه دى فأسمحولى أقول أن الزعيم الأسلامى محمد الفيشاوى - رضى الله عنه - شخصيه وهميه من تأليف صاحب الرساله دى يا أخى أياً كنت و أياً كانت نيتك .. مش حرام تدعى قول و تنسبه على الرسول صلى الله عليه و سلم أو مش حرام تدعى و تتنبأ حدوث شئ حلو او شئ وحش حدوث الأشياء قدر من عند الله - سبحانه و تعالى - و كمان الفرح هبه من الله مش من حضرتك و الحزن من عند الله مش من حضرتك برده و أنا طبعاً مش عامل كل ده عشان الرساله دى فقط .. لا ده فيه مليون رساله من هذه النوعيه و منشوره بشكل كبير جداً جداً على الأنترنت .. سواء على المسنجير أو الأيميل - على فكره فيه فرق بين الأتنين - و للأسف الناس بتصدق و بتبعت و بتخاف بجدو ده نوع من الرسايل أسمه
Chain messages
أو الرسائل المسلسله .. و محذرين منه فى كل المناهج ألى بتدرس الأنترنت ..

بتبقى مغرضه و لها أهداف خفيه و من جهات خبيثه , و غرضها بيبقى أفشاء الجهل أو نشر أشاعات أو أو أوو


فى ناس بقى تقول .. أما أألفلى رساله كده و أكدبلى فيها كدبه بيضاء بس المهم النيه .. و أنا نيتى أخدم الأسلام .. و كله يهون عشان الأسلام

هو الأسلام قال نكدب أو ندعى أو نلفق كلام أو نتظاهر بالتقوى و الشفافيه

,بعدين بقى طالاما فيه ناس بتصدق, و جهله أوى كده أنا هألف رساله أقول

أنى أقسمت بالله أنى شوفت صولاح الدين القليوبى - برده من القليوبيه - و السلطان قطر - ده قطز بتاع الخليج - و قالوا ان لو كل واحد مبعتليش خمسه جنيه على العنوان ده هتدوسه عربيه لورى فى خلال تلت ايام

و بكده أضمنلكم أنى هبقى مليونير فى خلال التلت أيام دول .. لأن عدد الجهله للأسف كتيرررررررررر


المهم .. عايزين الحل ؟؟؟أى رساله تجيلك فيها دعاء و شويه كلام تحت الدعاء كله هبل و كدب و تخاريف .. أمسح كل الكلام و سيب الدعاء و أكتب تحت الدعاء .. أبعت هذه الرساله , أو لا تبعتها , و الأجر و الثواب من عند الله

و بكده هنقضى على الرسايل ألى فيها تخاريف دى ..و نقضى على الجهل

و أحنا من موقعنا هذا .. نقف وقفه من ألى هيا دى .. عشان الرسايل دى وصلت عابدين .. و داخله على الدقى خلاص
الله .. الوطن .. محمد الفيشاوى

السبت، 8 مارس 2008

حريه تعبير

انا بعد ما كتبت امتسح تانى

ادخلوا انتوا بقى هنا وانتو هتلاقوا اللى كنت هقوله
مش معقول يعنى اكتب دا كله يعنى
تانى
ولا هااه

http://khayal87.blogspot.com/2008/03/blog-post_06.html

دا صديق واستاذ

الجمعة، 7 مارس 2008

تخاريف عيان !

بعد السلام والذى منه وبعد يباركله يا معلم

بعيد عنكم كدا بعيد بعيد عندى بررررررررد فظيع اتشوووووووو

المشكله مش فى البرد والقرف المشكله فى انه بيعملى صداع وعنيا بتوجعنى وبحس ان كتفى ساقط منى

دا كله عادى الواحد اتعود خلاص
المشكله الحقيقيه انى لاحظت حاجه غريبه كدا اول ما جانى البرد المره دى
لاحظت ان فيه علاقه ما بين البرد والرقم خمسه واى حاجه مدوره
يعنى مثلا
عندكم كدا يوم الاربع اللى فات كنت نازل اجيب الدليل
صحيت م النوم عادى ببص فى الساعه لقتها الساعه سته وخمسه قلت لسه بدرى كملت نوم
وصحيت برده بس سبحان الله شفتوا صحيت تانى بس تمانيه وخمسه
خلى بالكم كدا خمسه مرتين اهو
قومت لبست زنزلت والحاجات الروتينيه دى اللى الواحد زهق منه اصحى م النوم ادخل الحمام طيب ليه اول اما اصحى ادخل الحمام طيب انا مش عايز اعمل حمام
هدخل المطبخ واغسل وشى مش لازم ادخل الحمام يعنى
خلونا فى موضوعنا
جبت الكتب وانا راجع قعدت على كافيه اريح شويه
الترابيزه اللى قعدت عليه كانت مدوره زى الرقم خمسه
وكان رقمها 14 الرقم مش زى الرقم خمسه بس ثانيه انا كنت جايب معايا سندوتشات كانو سبعه
و
7-14 =7
وانا كان معايا كتابين اللى جبتهم
وهنطرحهم من سبعه يبقى الناتج خمسه
غريبه ولا مش غريبه
اكيد غرؤيبه طبعا انتو هتكدبونى ولا ايه
بعد ما روحت اتبقى معايا خمسه جنيه
ماحدش بقى يقولى صدف
اشتريت مجله ماجد بحب اقراها فيها معلومات حلوه
وسبحان الله رقم العدد بتاع المجله كان
1515
خمتسن اهم خمستين
وكمان كان عيد المجله التلاتين
ودا بيتعمل كل خمس سنين
ااها سامع حد بيقولى من ورا صدف برده
كدا بقى مش صدف خالص خالص ولا هااااه
لحظه كدا اليوم اللى جالى فيه البرد كان يوم خمسه مارس
ياترى ايه العلاقه
وكمان كان ماتش الزمالك واسمنت السويس عدد الاهداف كان خمسه
اه بالمناسبه انا اهلاوى
كفايه كدا دلوقتى عشان الحق اعملى كوبايه لمون سخنه كدا واخد البورشام احسن ابهدلكم معايا