عمرى ما مشيت جنب الحيط
لانى عرفت من بدرى ان جنب الحيط دى حته محجوزه للمخبرين
وانا مقدرشى اعطل السلطات عن تاديه عملها
فكرت شويه زى ناس كتير ان امشى جوا الحيط
بس اكتشفت ان دا غباء
والحمد لله انى موقعتش فى الغلطه دى
لان فى الحيط بتعيش القوى الظلاميه اللى الساده المخبرين عايشيين جنب الحيط عشان يخلصونا منها
طبعا دا فكره انى امشى الشارع كدا اعتبرتها من وساوس شيطان معارض استعذت منه باتنين ظباط أمن دوله
وزياده فى التاكيد علقت يافطه مكتوب عليها نعم
نعم وبس
نعم وخلاص
مش مهم بقى نعم لمين المهم انى موافق
بصراحه قعدت فتره محتار مش عارف امشى فين
فكرت تانى وتالت مفيش حل
طيب وبعدين اللى انا بعمله دا مش سلوك مواطن صالح ابدا
اكيد الفرجه على قناه الجزيره لوثت برائتى واثرت على صلاحى
اصل الجزيره دى قناه مش بتشوف غير نص الكبايه الفاضى
والمواطن الصالح مش لازم يشغل نفسه بنص الكبايه الفاضى
اصله فاضى هيعمل بيه ايه
ولا يشغل نفسه بالنص المليان اصله نص هيكفى مين ولا مين
المواطن الصالح لازم يتبع نصيحه مولانا ويحمد ربنا ان فيه كبايه
ومالوش دعوه بقى ان كانت مليانه ولا فاضيه دا كلام مثقفينانا مبحبوش
علشان كداقررت اقفل الباب اللى يدخلنى منه الشيطان وبطلت افكر فى موضو امشى فين دا خالص
وحمدت ربنا ان عندى اوضه فى البيت وقعدتفى اضوتى قافل على بابى ودى كانت الغلطه اللى كانت ممكن ادفع تمنها غالى
بس الحمد لله اخدت بالى منها بسرعه ومقفلتش بابى اكتر من عشر دقايق
اصل اللى يقفل بابه يبقى عنده حاجه مخبيها والواحد هيخبى ايه الا لو حاجه غلط
ودى غلطه مش بسيطه دى غلطه ممكن تضيع اى مواطن مهما كان صالح زى كدا
علشان كدا والنبى يا جماعه تخلو الكلام دا بينا والغلطه دى مش تطلع لحد ابدا
انا بس بقولكم الكلام عشان مش تغلطوا غلطتى
واحب الامن الدوله اغنيه عمرو دياب انا اكتر واحد بيحبك
تيت راديو